By: Arthur Bawilianthang Fantu

Pathian sinah cheuhra cheukhat rak put mi hal tthan ahmang mi Khrihfa an rak um bal. khrihfabu ah buaibainak fak deuh in a chuah tikah, an chim tawn ka theih mi cu, “ka cheuhra cheukhat pek mi cazin khumh ningin, ka pek mi dihlak ka khirh uh! Khrihfabu in ka chuak lai,” tihi asi.

Pathian maw kan pek, khrihfabu minung dah? Pathian sinah maw kan chiah, minung sinah dah kan i khon? Bulletin chungah min langh duh ah maw, midang ape lomi kutdong sawh duh ah dah kan pek? Pathian ta an si timi lungput in maw kan pek, athlawchuah hmuh tthan duh ah kan pek? tihi thuk deuh in kan ruah cio dingah ka duh.

Dr. John Mark Terry nih, “Ngaihchiat awk ngaingai asi mi cu, Khrihfa atam deuh cu nutling/patling ah an i chuah ballo, an piangthar ko nain zultu ttha an si ballo, phundang incun, thlarau nun ah hngakchia an si zungzal,” a ti.

Khrihfa nun a tthan lo ruangah sunghmi thil phun2 an um: (1) Pathian thlawchuah kan tinco dingmi kan sung ttheo tawn, (2) Khrihfabu ii tthithruainak ah tthanchonak chuahpitu siloin, buainak an chuahpi ttheo tawn. Curuangah khrihfabu akhing a rit ngai tawn, ti zongin Dr. John nih cun a ttial.

Khamhnak kan co hi Pathian nih a kan tinhpiak mi a donghnak asi hrimhrim lo. Hringtu kan nule paw chungin kan hungchuah tiang lawng kha a rak za lo. Hnukthlum hang le ti le rawlthaw kan din-ei i kan tthan aherh rih. Cubantuk tthiamtthiam in, Khrih Jesuh muisam kan ken le amah kan lawh hlan tiang kan tthan aherh ve. Thlarau hnukhang kan hal le kan din aherh, cun kan tthan aherh (1 Peter 2:2). Amah Khrih kan theihnak ah kan tthan a herhnak aruang cu, amah Khrih kan lawh chinchin khawhnak hnga asi (2 Peter 3: 18).

Kan khrihfa nun a tthan khawh lonak aruang phun tampi lakah, dawnkhaantu pakhat cu kan chawva le ngeihchiah hna hi an rak si ttheo tawn. Nihinni Khrihfa tampi cu, Luke 18:18-23 chung i mirum pa pakhat he tahchunh phu kan si. Mirum pa nih cun nupa sualnak tuah kha a hrial. Lai a nawng lo. Cun midang thil  a fir bal fawn lo. Ahman lomi tehte a dirpi ballo i hringtu a nule pa kha upatnak a pek zungzal hna. Asinain a chawva Pathian sin pek a siang lo. Phundangin kan chim ahcun, thawhlawm le cheuhra cheukhat pek ahmang lo ti zong ti khawh a si i, a daithlang kan ti zongah kan palh lai ka zum lo. Misifak le ngakttah hna, nuhmei asi taktak mi hna le midang bomhchanh zongkha aa harh tuk, a duh a fak i a hak a kau tinak a si.

Luke 18: 18-23 hi keimah nih cun thawngttha ka chimnak ah ka chim bal rih lo. Atu ka ttial mi hi thawngttha chim can ah kai rinh lai caah, rak rel ve hram dingin Bawikhrih min in kan sawm. Mirum pa kong cu voitampi kan theih nain, a dirhmun ah ahohmanh kan i dir ter bal rih lai ka zum lo. Na pumpak khrihfa nun van i purdap ve hmanh!

Malaysia ah raalzaam dirhmun in rian kan ttuan cio dih hna va si kaw, thlakhat ah zapi zaraan kan thlahlawh cu, Rm 900-3000 an si hna. Rm. 3000 caah cheuhra cheukhat cu Rm. 300 a va si cu mu? Rm. 300 pek aa fawihmi nak in aa harhmi kan tam deuh tiah ti ning law ka palh hnga dek maw? Aruang cu, kawlram phaisathlen tthat lio ningin tuak ahcun, Rm 300 cu Ks in tingkhat fai asi. Sifak chungkhar caah facang tun3 a rak cawk khawh diam ve, thla3 chung lungretheih ding a um hnga lo. Dollar ($), Ringgit (Rm), le Rupees (Rs) in cheuhra cheukhat pek cu a fawi deuh tuk rih, kyat (Ks) in pek cu kan rak i harh ngai cio ko lai dah ka ti? Cheuhra cheukhat cu mah vial cun sirih sehlaw chim kaa timhmi nan fiang ngai lai ka zumh. Mirum nih an hak a kau chin ve, sifak nih phaisa kan ui chinchin ve (Mirum dihlak nih phaisa an ui, i sifak dihlak nih phaisa an semrel ka ti duhnak asi hrimhrim lo). Khrihfa upa te nih thawhlawm le bawipa zaanriah hman caan i sifak harsa mi hna bomhchanh dingin kholhmi thawhhlawm nan rel tawn ahkhin, Rm. 1 (Ringgit One) a tam bik zungzal ko lo maw? Sangpumh le home-cell (Life Group) pumhzaan i thawhlawm kholh a dohtu zong a karh lei kan si cang rua dah ka ti? Crusade le camping zaanpumh thawhlawm kholh mi khi a rel nan bawm bal ve hna maw? Rm. 1, 5, 10, 20, 50 ah zei cahnah dah atam bik nan rel tawn?

Pathian cu phaisa atlawm le atam azoh lo, sian le sian lo tu azoh deuh tiah nan thinlung in mi pazeizat nih dah nan hei ka ti cio hnga? A dik, Pathian nih thinlung azoh i chawva tlawm le tam kha azoh lo. Asiah pehnak kongah Pathian nih zumtu pakhat thinlung cu azeibik khi dah azoh lai tiah nan ruah cio? Pathian hmaiah biatak kan chim cio asi ahcun, Rm. 1 kan pek zungzal cu, Rm. 5, 10, 20 le 50 etc,.. kan pek sian lo asi ko lo maw? Bawipa, kum 2016 chungah thawhlawm Rm. 1 kan pek tawn mi kha kum 2017 ahcun Rm. 10 kan pek zungzal cang lai. Kan pek zungzal khawhnak hnga thlawchuah ka pek zungzal hram ko tiah, khrihfa milurel pazeizat nih dah Pathian hmaiah khupbil thlazacam in nun-apnak le biakamnak kan ngeih? kanmah te cio in kan i hngalh dih bang khan asi ko. Ka nolhtthan rih ko lai, mirum pa kong cu Luke 18: 18-23 ah kan rel i kan chim nain mirum pa dirhmun ah kan i chia ballo. Zeidang vialte ah Pathian caah kan ttang sawk len nain phaisa le chaw le va nih kan thlarau nun tthan a phih ttheo tawn. Jesuh nih mirum pa nih ahngakchiat ten a zulh khawh mi cu alomhpi ngai lai nain a zulh khawh rih lomi chawva in Pathian rianh kha Jesuh nih cun arak cawnpiak kha kan hmuh.

Cheuhra cheukhat pek daithlan le thawhlawm pek tlawm tuk zungzal cu, ka biahmaitthi ah ka chim cang bangkhan, Pathian thlawchuah kan tinco mi a tlawm tuk zungzal ve ko lai. Cuti’n kan kal peng rih ko ahcun, hnekchom in cheuhra cheukhat le thawhhlawm apemi kan si te sual lai ti phan a um ngaingai. Khrihfabu caah khing rit ngaimi member na/ka si lai ding zong phan aum ngaingai fawn.

Cheuhra cheukhat cu nawlbia ruangah rak pek mi arak si lo. Hramhram in pek fialmi zong arak si hlei fawn lo. Pathian nih zeizongza vialte hi a ngeih dih hna, minung kan ngeih le chiah telhchih in amah ta an si dih, minung cu a chawkengtu (Stewardship) men lawnglawng kan si, timi theihfiannak in ai thawkmi peknak asi. “Kan pekmi cheuhra cheukhat hna cu Pathian ta an si timi langhternak cale angeitu Pathian upat ttihzahnak langhternak ca i rak ken mi kutput a si,” tiah The Wycliffe Bible Encyclopedia nih cun a hrilhfianh. Deutronomy 26: 16 nih mah le thinlung thlehbauh ningin kan pek ding kha a rak chim duhnak a si.

“Malachi 3:10 ah cheuhra cheukhat kong kan rel tawnmi nih khin, phun 3 in a kan cawnpiak mi aum,” tiah Dr. John Mark Terry nih cun a ttial. “(1) Khrihfabu tthawngttha tein adir le rian a ttuan khawhnak hnga ding caah aherh mi chawva cu cheuhra cheukhat in alutmi chungin hman ding asi. (2) Cheuhra cheukhat cu mah le i pumhtawnnak biakinn ah rak put ding asi. Cheuhra cheukhat leng i pekmi le a dangdang pekchanhnak  hna cu, Pathian rianttuantu hna le rianttuannak dangdang hman ding caah pek khawh a si. (3) Cheuhra cheukhat apetu hna cu Pathian nih thlawchuah a kamh ve hna. Pathian nih thlawchuah a kamh mi hna cu micheu nihcun Pathian sinah an pekmi chawva cu Pathian nih chawnva tam chinchin in a leh rulh hna lai, thlawchuah a pek tthan ve hna lai tiin Bible a sullam an i leh, cucu a palh mi a si tiah. Bible nih cuticun a kan cawn piak lo. Pathian thlawchuah cu a lam phun tampi in kan cungah a tlung kho ko,” tiah a ttial chap.

Micheukhat ve zong nih, “cheuhra cheukhat cu biakinn ah rak put ding asi lo. Moses nawlbia ruangah rak pek asi i, atu chan cu nawlbia nih a kan uk lo i, nawlbia cu a dongh cang caah, zaangfahnak chan ah a tlong leng mi kan si cang caah, cheuhra cheukhat cu pek kan ngol awk asi,” tiah bia-alnak an tuah. Cuti a chim mi hna nih palhnak phun2 an ngeih. (1) Moses hmangin cheuhra cheukhat pek dingin nawl chuah a rak si hlan, kum 400 hlan ahkhan, Abraham nih tlangbawi sinah cheuhra cheukhat a rak pek cang kha kan hmuh (Gen. 14: 20). (2) Bible Biakam Thar ah cheuhra cheukhat kan rak put awk a si kha Paul nih 1 Korin 16: 2 ah, fiang tuk in a rak ttial,” tiah Dr. John Mark Terry nih “How to Grow as a Chritian” timi cauk a dongnak dal ah a ttial. Cucu cheuhra cheukhat he pehtlaiin kan pek a herhnak Bible umkal-ning cu asi.

Cheuhra cheukhat pek lo cu Pathian ngeihchiah chawva firtu nan si tiah Malachi 3: 8-9 nih fiang tein a langhter. Israel miphun nih an cheuhra cheukhat siseh, an lo chuak tisik-anhnah cu rawlruuk ah cun an rak put hna, cu rawlruuk cu Tempal ah a ummi  a si. Nihin chanthar kan vawlei nih a kalpi ve ningin kan chim ahcun, cu Tempal cu kan i pumhkhawmhnak biakinn hi asi caah, cheuhra cheukhat Pathian sinah felfai tein le zumhtlak tein kan rak put tikah, Pathian biakamh mi thlawchuah cu kan co ve dingin kan i ruah chan ngam ve ding a si.

Cheuhra cheukhat kan rak put tikah, mahzawn ruat lo tein (Siang Bute’n), lungtho tein le lunglawm tein pek dingin 2 Korin 8: 1-7 ah fiang te’n kan hmuh khawh. Hmuhlei nak in peklei ah thlawchuah a um deuh caah, kan pek ahhin, kan i lomh awk a si. Cu nun cu, Khrih ah nutling/patling kan sinak, amah kan lawhnak le kan khrihfa nun a tthannak a langhnak ah si hram seh.

Dr. John Mark Terry nih, “How To Grow As A Christian” timi a ttial mi cauk cherhchan ah hmangin ka ttial tthanmi asi. Anih cu, Southwestern Theological Baptist Seminary, Fort Worth, Texas ih dirhmi sianginn in Master le Ph.D arak dih hnu le Pathian rian kum caan saupi a ttuan hnu ah, Malaysia Baptist Theological Seminary (MBTS) ah Visiting Professor of Missions ttuanmi asi zong theih chih asi. “Khrihfa Nun Zeitindah A Tthan Khawh Lai?” timi cauk na rel ahcun, na Bible theihnak a kauhter deuh lai pinah, na Khrihfa nun zong tthan hram ai awt hrimhrim lai caah, nan rak rel cio lai nak hnga duhsaknak he Laica in ka vun ttial chinnak cu asi.

Reference

Terry, John Mark. [201-?]. How to Grow as a Christian. Pulau Pinang: Institute of Biblical Interpretation.