By Isaiah Ngun Nawl

Nihin kan ram le ka miphun nih chantiluan kan dawi cuamhmah lioah, ttihnung ngai a simi nu le nu/ pa le pa sualtti (homosexuality) tluk ttih a nungmi kan hrial thiam lai lo ka phang hringhran. Kan chan ko ah hin, kan pipu hna channak in sualnak a karh ning hi a rang khun, i aphun zong a tam khun ti khawh a si. Pumsa duhnak le horduhcuainak hna hi keimah thok in kan dihlak nih kan hrial le kan i sum ding hrimhrim a si. Hitihin biahalnak tuah kan duh hna, “Nu le nu or pa le pa sualnak a tuahmi hna hi Van ah hmunhma an ngei ve te hnga maw?” 

Biakam Hlun chungin homosexualilty he pehtlain chim ka ngei nain, Paul nih Korin Cakuat ah Korin khuami hna sinah biapi in a chimmi kong tuah ka rak ttial lai (1 Cor. 6: 9-10). Pennak chung ii luhkhawh lo ciocio ah nu le nu or pa le pa sualnak hi sualnak dang vialte nak in cun a sual khun ka tinak cu a si lo, asinain nitlaak ram tbk ah cun Pathian rian ttuantu hna cheukhat nun cu, cu sualnak tuah ko cu ti hal in an hal, i an hlaw sianglo. Kan ram le miphun lak ah a chuak lai lo tiah kan chim khawh lomi a si bantukin, ralrin pek le theihternak run ngeih ka duh chih fawn.

Mitha lomi nih cun Pathian Pennak cu an co lai lo ti kha fiang tein nan hgnalh ko. Nanmah le nanmah kha ii hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le, mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo (1 Cor. 6: 9-10).

Paul nih pehzul tein a chim rihmi cu, Korin khrihfabu lakah hin, Khrih an rak zumh hlan ah an nungcan ziaza le Khrih an zumh hnu an nun kha cuai a thlai timi a fiang. Evangelist Billy Graham a thei lomi kan tlawm lai, Graham nih cun “Pathian nih midang a dawttluk hna ning in, homosexuals pawl zong hi a dawt ve ko hna. Sualnak nganpi an tuah cu a si ko nain, siasal a biami hna le nupi cung nu a duh mi le va cung pa a duh mihna nak in an sual hlei deuh ti zong in ka ruat lo. Cucaah, keinih cun sualngan tuk in ka ruat lem lo,” a ti. Pathian nih cun homosexuals pawl zong hi a dawt tuk ve ko hna ii a ngaihthiam khawh fawn ko hna, amah sin a panhmi paohpaoh cu a cohlan hna ii an sualnak a ngaihthiam ko hna timi kong ah cun a fiang ko va si kaw, amah balte, ka biahalnak vun i nolh ka duhmi cu “Pathian nih homosexual pawl cu Khrih ah a ngaihthiam cang hna hnu, phundang in cun, khamh an si hnu ah homosexuals a si rih komi hna hi a khamhmi hna an si maw?’ timi thuk deuhin kan ruah ding ah ka duh. Billy Graham a fapa Franklin Graham ve nih cun biahalnak ii a lehmi hna ah “….micheu nih an ka halmi cu “nu le nu or pa le pa sualnak a tuahmi hna hi van ah an kai kho ve maw?” tihi a si, ka lehmi hna cu, ‘kai ee, kai kho tuk ta’ ka ti hna. Sihmanhsehlaw, mah bantuk hna nih khamhnak an co ii van an kainak ding ahcun an sual nak vialte an kaltak a herh. Cun Khrih kha an khamhtu le an Bawipa ah an zumh/an cohlan a herh. Cun a hnu an zulh ding zong a herh. Khrihfa ka si na ti a si ahcun, homosexuality or gay le Lesbian tbt., hna ah hin na um kho in na nun pehzuul in na nung kho hrimhrim ti lo,” ati bak ve hna.

Pathian dawtnak kan theih hlan ii, kan rak tuah tawnmi sualnak cu pei ahlei in ngaihthiamnak kan co kha? Ka suallai mi zong a ka ngaihthiam ko lai timi lungput kan pawi le pumsa duhnak le horduhcuainak ah kan i bualh peng rih ko ahcun, cucu Bawipa velngeih zaangfahnak zei ah kan rello he aa khat bakmi a si hnga. “Kei zong nih kan ngaihthiam ve, a sual bal va sual ti hlah” timi balte philh ve hna hlah u sih. “Kan ngaihthiam cang na sual laimi zong kan ngaihthiam” timi Baibal ah a um hrimhrim lo, ti zong raalttha tein vun in chimh kan duh hna. Cucaah, mi pakhat nih Khrihfa ka si a ti tung ii, Baibal cawnpiaknak zong a theih ko, a tuah awk ding zong a theih ko buin, a sualnak a pehzulh lengmang mihna si hna seh, cun mahnak hmanh in a sual deuh rihmi cu, sualnak in ii mer duhnak hman a lungput ah a sem lo cang ahcun, a fiangmi cu, Khrih kha hngalh ko butein a hlawt ii, biatak kha sualkhuhnak men ah a hman ti khawh a si, hibantuk mi hna caah khamhnak a um lo. Jeim nih cun, “kha nan zumhnak men nih khan an khamh kho hna laimaw” tiin faktuk in a ti hna ka zumh. Peter nih, “dinnak lam kha hngalh tung ii nawlbia thiang kha mertak tthan nakcha cun, dinnak lam kha hngallo lawlaw in rak um ah an caah attha deuh suaumau hnga,” a ti (2 Pet. 2: 21-22).

Forhfialnak—mi pakhat khat nih Khrih ka zumh cang, khamh ka si cang ati asi ahcun, Baibal nih sual a phawtmi vialte le sual a si a timi vialte;

  • Tthitumh loin nupa sualnak,
  • Nupi cung nu duh le va cung pa duhnak,
  • Siasal biak,
  • Doih-aih (camhthiamnak hna)
  • Lihchim le mithil fir tbt… tampi an um len ko, mah vialte hna hi a hrial/ngol cang hna lai ii, thianhlimnak kha a dawi in nun ningthar in a nun a herh. Zumtu nun cu, tuahloding timi hrialkhawh tiang lawng a za lo, tuahdingmi le dawiding timi tete zong kha kan theih ii kan zulh chih a hau tthiamtthiam. Hrial dingmi lawng hrial kan timh ii, dawi dingmi ahnu kan dawi ttung loah cun, sualnak kan rak tuah cia mi lak ah tlak tthan a fawi te caah kan Khrihfa nun hi kan ralven thiam zungzal a herh.

Ttialpeh kan rak i zuam lai. Pathian nih nan thlaraumit deiter hram sehlaw, thlachuahnak le thazaangthar he nan nun khahter hram seh tiin ka bia ka donghter rih lai.

References 

John F. MacArthur, “The MacArthur Study Bible”

John F. Walvoord, “Bible Knowledge Commentary”

Neil Wilson, “Life Application Bible Commentary, 1 & 2 Corinthians”

Mark Water, “The New Encyclopedia of Christian Quotations” vol. 2

Stanley J. Grenz, “Sexaul Ethics: An Evangelical Perspective

http://www.christiananswers.net/q-dml/dml-y023

http://www.waytogod.org/qgay.asp

http://www.cnsnews.com/blog/michael-w-chapman/rev-graham-you-cannot -stay-gay-and-call-yourself-christian-gays-must-leave 

Advertisements