By Arthur Bawilianthang Fantu

Kan takpum adam lo tikah sibawi kan herh i si-inn ah kan kal tawn. Tukvelhnak le buaibainak achuah tikah acozah sihnii (lawyers) kan fuhpanh hna i biaceihzung ah kan kal tawn. Mitcaw, hnachet, keibei hna nih tthi-hrauitu le cawmkengtu an herh i nu le pa ngeilo nih ngakttah cawmnak inn an herh ve. Cucu taksa nih aherhmi a si caah hrial awk attha lomi le kan rak ton balmi an si i, kan ton cuahmahmi le kan ton rih lai ding thil an si hna. Cu nih a kan hngalhter mi pakhat cu, taksapum caah herhmi le fuhpanh mi kan ngaih ttheo tawn bantukin, kan thlarau nunnak zongah herhmi le fuhpanh awk a ngeih ve hrim ding a si.

Baibal kan rel tikah biaharsa le lung fianlonak tete a um ttheo tawn. Cucaah, Baibal sullam a kan hrilhfiah khotu, Baibal lei in cawnnak, thiamsang angeimi le cauk tthattha tam ngaiin kan ngeih kawh le kan rel hna an herh. Cun, harsatnak phunzakip nih lungdong cikcek tiangin a kan tuahto tikah kan thlarau nun a derthawm tuk tawn. Culio ah kan herhmi cu, Pastor le Khrihfabu mipi an si hna. Pathian kan herh caah thlacam cu daithlanh awk attha hngin lo. Pathian, tukhaaltu le hruaimi mipi cu, mah lawngin acawlcangmi si loin, aa funtom i, aa bawmchan ding le thazaang aa pe zungzal ding kan si.

Minung hi tlakin sermi beel bantuk kan si. Tlak-um (Beel) cu kan khawn sual le kan thlak sual tikah akekkuai, amaan i a muisam a rawk dih cikcek. Cucaah, akuaimi tlak-um sersiam tthan ding caah cun a sertu sinah kalpi i sersiam tthan le a kehkuainak kha tlakthar in benh i dawh tein maimilh tthan ahau. Cuhnu lawngah hman a thlami tlak-um ah aa chuah tthan lai. Cubantuk tthiamtthiam in, kan thlarau nun hi vawlei cung sualnak le harnak nih faktuk in a khawnden sual tikah hin kan khrihfa nuncan ziaza hi a muisam rawk dih tawn ve. Hman awk ai tlak ti lo, i kan nun cawn awk a thlak ttheo tawn lo. Kan thlarau nun hrawktu hi kan ralven thiam lawng nih hin a zat lo i sertu  le remhtu (maimilh piaktu) Pathian kan herh zungzal. Cun, tukhaaltu le khrihfabu (Tuu), mipi nih hin thlacamnak le dawtnak he kan nun aa sersiam ding kan si tihi kan pemh dingah ka duh. Khirhfabu ah entainak, huatnak le tthencheunak achuah tikah, aa fuuntom tthannak ding ahcun khrihfabu mipi lila kha a si ahau zungzal. Taksalei buaibainak cu cozah nih a tawlrel bantukin, thlarau lei buaibainak cu thlarau lei tthi-hruaitu le amah he aa pehtlaimi khrihfabu lila nih a tawlrel awk a si tiin, Dr. Sonny Acho bia hmangin chim chin ka duh.

Baibal hi kan dirnak kan hrampi cu a si, asinain cauk dang tampi hi kan rel awk an si i kan rak ttial chinmi tete zongnih hin atlawm le atam cu tthathnemnak achuahpi ttheo lai tiin kan i ruahchan caah, Baibal theihkauhnak, tharau rawl, le theih kauhnak dang tete nan rak rel khawh ve dingin tiin Mei-inn Missions Organization (M.M.O) dirh in, M.M.O website ah le M.M.O Facebook Group le Group dangdangah ca kan rak ttial le kan thlah ve tawnnak cu a si.

Baibal relcaan hi kan pek a tlawm deuh ngaingai cang i Online hi caan tam deuh kan pek cio cang hna, cucu chantiluan ruangah a si tiin kan hmuh. Cupin ah, cauk ttha atam u cu mirang ca in ttialmi a tam deuh caah Laimi zapi nih kan rel kho dih ve ti hoi lo. Lai holh Laica in carel awk atlawm ngai rih ti zongin chim khawh a si. Cun cauk ttha hi an man afak ngaingai i zapi le chungkhar terual he khuasa caah cun cawk a rak fawi ve lo. Wifi le Mobile Data balte hi zapi nih alakin (free) in hman khawh le man fawi tein cawk khawhmi a si caah, ca ttha kan rel chinmi chungin, kan hmuhning hna hi Free Online Website hmangin alak tein rel kho ve dingin zawnruahnak he kan van in thlah piak tawn hna nak cu a si. Cucaah mipi lei zongin nan rak theihthiam ve i, rak rel peng, like le share tuah i comment rak ttial ve tawn dingin zanghlei nan rak kan cawipiak ve nak hnga sawm le nawl kan in duh ko hna, cucu M.M.O cattialtu lei i kan saduhthah mi, kan van langhter ta ve.

Careltu nan dihlak Bawipa nih thlawchuah inpe hram hna seh.

Advertisements