By Isaiah Ngun Nawl

Mihrut tiah ti/auhmi si a duhmi kan um lai ka zum lo. Thawngttha chimtu pakhat nih, “mihrut nih fim an duh, i mifim nih an duh chinchin” tiah a rak chim bal. Voitampi cu, hruh hi kan ii thim lo ko buin, hruhnak hi lam khatkhat in kanmah ah a langh caan a um ttheo tawn. Mirang phungthluk kan theih a tambik pakhat, “ahohmanh atling dihmi kan um lo” (No one is perfect) ti hi a si. Nuhrinfa sinak ah a tlingmi kan rak um lo hrim ko mu?

Mihrut zong nih mifim an lawh caan a um tawn ko, i mifim timpi zong cu mihrut an lawh caan a rak um len vetawn. Mifim cheukhat cu hruh ko kha aa thimmi ko an lo tawn. Cuhnalak i minthang ngai pakhat, Baibal ah kan hmuhmi cu, Lamkaltu Paul hi a si. Paul cu mipi nih rak upat ngaimi, Gamaliel kut tangah ca-cawngmi a si. Biaknak lei zongah soisel a tong lo. Phunsang le cawnnak sang a ngeimi zong a si fawn (Lam. 5; Filipi 3), mifim le uktu bawi cheukhat zongnih theihpi mi a si. Asinain, Festas timi, bawi pakhat nih Paul cu, “Paul, na hrut cang! Na cawnsannak nih an hruhter cang” a rak tibal mi pa a rak si (Lam.26: 24).

Caankhat lioah Khrihfabu hrawh le hrem kha aa rak ii hruhpi zungzal tu, Paul cu Jesuh he an i ton hnu cun, a nun thlengtu a Bawipa Jesuh fialmi rian lawng kha aa hruhpi tu pa ah aa hun i chuah. Thawngttha chim fial a si kha aa theih i a kalnak hmunkip le kakip ah Khrih thawngttha lawng cu a chim. A rak cawnmi fimnak le thiamnak cu thawngttha chimphuannak caah bawmtu ttha ah a run hman hna. Paul chanlio ah, amah khuk thiirual minung tampi cu mifim, minthang le mi lianngan an si tiin minih rak theih kha an rak i uantharpi ngai lio ah, Paul cu mifim-hrut ah a hun i cang. Paul cu ruangngei tein a hrut. Pathian a thei lomi hna lawng hlah, kha lio Khrihfa mitampi hna chung lila nih, Paul cu an uar ziar ti lo ai. Khatluk mifim pakhat, mipi mit ah mihrut bantuk rak si cu, khuaruahhar lo awk hrim a ttha lo.

Minih nih uar lo ngainak, huatnak le soiselnak hna, mihrut (mimolh) ti arak ton ah, Paul nih hin kiangkap zohchuk aton hi i theih loin cun a rak um hnga maw? Stoics le Epecurians pawl chinchap nih cun, “mihrutpa, langh a duh ngai tungmi hi zeidah achim len ko hnga?” an ti. “Ramdangmi hna pathian kong chim dawh a si,” ti zongin mi bia-eng a-in a tlawm te lai lo dah? Paul cu Khrih Jesuh kong le thawhtthannak kong achim ruangah a kongceih le hruh phawt a tuar pei (Lam. 17: 18)? Paul cakuat kan zoh tikah Korin khua um, zumtu cheukhat cu Khrih le a thawngttha ruangah harsatnak, paamnak, ningzahnak le hremnak hna cu an si khawh chungin hrial an i zuam hna. Khamhnak cotiang hrawnglawng ah khan an i lungsi. Khapin cun, kan fimve ko ti kha minih hngal h piak an duh. Cucaah Paul nih, “Nannih cu Khrih chungah nan fim, kannih cu Khrih ruangah kan hrut,” a tinak cu a si cu. Zumtu cheukhat hna tahfung ah, Khrih chungah mifim si hi lianngan deuh ah an ruah. Paul ve nih cun, hmurka in siseh, nuncan in siseh, Khrih ruangah mihrut tiin auh ii huah cu Khrih chungah mifim sinak in a lianngan deuh, zumhnak ah patling dirhmun a si deuh leiin a hun langhter ve.

Paul thinlung ah a Bawipa Khrih lawng a um, a mit le a hna ah hin a Bawipa aw lawnglawng kha a thei pengmi, zumhnak ah pa raalttha a si. Midang nih a langtlang le an ruahnak rinh in bia an rak ceihmi ah le amah le mah aa hmuh ning ah khan a nun aa tthum bal lo. A dikmi biaceihtu cu a rianhmi a Bawipa si kha aa cinken zungzal.

Bawipa bia a thei/ngai pengmi kan si asi ahcun, minih lenglei in bia an kan ceihnak men ah hin kan zei a poi awk a si lo. Ttihnak zong kan ngeih ding  a si lo. Khrih ruangah hruh cu Khrih chungah mifim sinak in a biapi deuh in hmual a ngei deuh ti zong kan theihfian a herh. Khrih chungah mifim si cu a kar khatnak kan kar lawng a si hnga. Phundang in chim ahcun, “Pathian dawtnak kan theih; khamhkan si; nunnak cauk chung i kan min ttial a si kha a si. Kanmah kanhei hruh ko hmanhah Khrih hrimhrim kha kan fimnak ah ser a si (1 Cor. 1: 30).

Wilmington nih cun, 1 Cor. 4: 10 nak konghe pehtlain hi tihin fianternak a tuah, “Korin Khrihfa mi hna cu, an fimnak ah khan pakhat le pakhat hehtiah an ii thangthat (an ii lawmhpi) cuahmah lioah, Paul le Timothy balte Khrih ruangah mihrut ah ser an rak si,” a ti. Korin Khrihfa hna bantuk zumtu sive sual lai phan a um ngaingai. Kannih zumtu atu kan chan ah hintah, Khrih ruangah hruh maw kan duh/ton deuh” asiloah Khrih chungah mifim sinak ah hin dah kan dii a riam ko lai?  Theology (Pathian Bia/Kong) cawn cu a biapi tuk henta, asinain, theihnak tiang lawngah kan nun tang peng ti hlah seh. Theology nih ai tinhmi le a konglam a chimmi Pa, kan Khamhtu Bawi Jesuh caah, zeitiangdah hmai kan kal khawh ve lai ti le Pual nun ngeih tu i zuam hna u sih. Minung mit ah Khrih ruangah hruh cu, Pathian mit ah Khrih ah le Khrih ruangah a fimmi kan si zungzal ko lai.

References

Spence-Jones, H. D. M. (Hrsg.): The Pulpit Commentary: 1 Corinthians. Bellingham, WA : Logos Research Systems, Inc., 2004, S. 134

Willmington, H. L.: Willmington’s Bible Handbook. Wheaton, Ill. : Tyndale House Publishers, 1997, S. 681

Wiersbe, Warren W.: Wiersbe’s Expository Outlines on the New Testament. Wheaton, Ill. : Victor Books, 1997, c1992, S. 428

http://biblehub.com/1_corinthians/4-10.htm

Advertisements