By Arthur Bawilianthang Fantu

“Adam hi vawlei cung minung hmaisa bik asi lo” timi cawnpiaknak cu, “Pre-Adamism or Pre-Adamic Man or Pre-Adamites” theory aa hrawmmi an si. Annih nih cun, Adam hlanah vawlei cungah minung an rak um cang, an ti.

Adam, Ser Hmasa Minung A Si Lonak  Zohttinak

(1) 1655 kum ah, Isaac La Peyrère nih azumhnak fianternak (Theory) cu zapi hngalh awk le rel awkin cauk pakhat a rak chuahmi ah Pathian nih Adam cu leidip in a ser lo, culawng silloin, Cain nupi le khuami hna cu Adam hlan sermi minung an si, tiin a ttial. Amah hi Jew mi a si, a pianthar i Roman Catholic (RC) ah a lut, tiin a konglam theitu pakhat nih a chim.

Kumzabu 17 lioah, Bible sullam langhtertu hna (Bible Expositors) nih Cain nupi cikor he pehtlaiin biahalnak an rak leh khawhhna hlan deuh ah, Isaac nih a chim manhmi cu, Adam cu Jew miphun lakah mi hmasabik le Jew hna i anpa bik a si, nain, vawlei cung minung hmasabik a si lo, a ti. Anih hi, si-nak sual (Doctrine of Original Sin) a pom lo. Adam thawngin misual kan sinak zong adoh. Khamhnak cu mizapi caah a si a ti. Eve zong vawlei cung minu hmasabik a si lo. Jew miphun hna i nu hmasabik le nu bikcem lawng a si, a ti. Culawnghlah, Genesis in Deuteronomy cu Moses ttialmi cauk a si lo a ti. Cun, Noah buanchukcho cu, kha lio chan le miphun hna cung lawngah a tlung, vawlei cung pumpi huap a si lo a ti (The flood was local, not global). Gentiles miphun hna cu Adam hlan minung hna cithlah an si ruangah, nihinni ah miphun le taksa rawng dang a kengmi hna: Negroes, Chinese, Eskimos, American Indians, Malays le miphun dang tampi an hung um cionak a si, tiin a ttial chap.

(2) Kumzabu 18 le 19 lioah Khrihfa lakah mitlawmte nih minak le mirang tiin miphun le taksa rawng aa danning hoih in, Adam he aa dangin Pathian nih minung dang ser dawhin an hun ruahdamh tthan ve. Cuticun Pathian nih Adam a ser hlanin miphun dang pakhat or pakhatnak tam deuh a ser cang (Polygeism/Polygeny), phundang in cun, Adam hlanah Pathian nih miphun tampi a rak ser hna, timi ruahnak an pawi.

(3) Kumzabu 20 ah Darwinism (Google ah a sullam rel piak) le Discovery tuahtu pawl nih minung ruh (Human Fossils) an rak hmuh. Minung ruh cu zohfelnak an tuah tiakah, Adam ser a rak si hlan, kum million tluk arau cangmi ah rak um cang dawhin thanhnak an rak tuah. Evangelical lei in cheukhat nih Theistic Evolution ruahning an hun cohlanpiak hna tikah, minung ruh cu, Adam hi vawlei cung minung hmasabik asi tiah a pomtuhna cherhchan ttha ngai pakhat ah a hung i chuahnak a si.

(4) Anglican buu hruaitu pakhat a simi, Time Magazine nih kum 2005 lioah vawlei cungah mipi lunghip khotubik thimmi 100 lakah tleicia John R.W. Stott (1921-2011) cu aa tel ve. Stott cu vanchiat ah Adam hlanah Pathian nih minung a ser ko hna, cu hna lakin Adam hi ser chinmi a si, tiah a pom ve ai.

(5) Kum 2015 ah khan, zerhkhat nihlawh phelh in ‘Camping’ ka rak kai bal ve. Cawnpiaktu sayapa nih anikhatnak ni ah Adam hlanah minung dang an rak um cangnak cu biatak tein a chim. Cun Cain nih afar nupi ah atthit ticu a si kho lo, Bible nih akham caah Cain nih afar a tthit bia siloin, Adam hlan sermi minung hna lakah nu pakhat kha atthit, tiah a chim. Achim rihmi pakhat cu, Bible hi a palh kho, Pathian bia a si dih lo., tile Bible cu minung40 leng nih ttialmi a si caah an palh kho dih, cahang sen in aa ttialmi lawnglawng Jesuh chimmi a si caah a palh kho lo, a ti. Matthew, Mark, Luke le John nih aakhat mi Jesuh tuanbia an i dannak hna cherhchan ah biatak tukin a rak hman hna.

(6) The Chin News & Rawn Chin ah thlahmi Article pakhat cu 2017-June ahkhan ka rel. Cattialtu nih amah pumpak in kumkhat fai Research atuah hnuah a ttialmi a si. “Adam Hi Vawlei Cung Minung Hmaisa Bik Asi Loh” tiin tlang a taar. Sourcezong ttha tein a rak pek caah rel le ngaih khawh a si. Rel aduhmi nih hika Link hi rak hmeh piak le rel khawh a si. http://www.thechinnews.com/adam-hi-vawlei-cung-minung-hmaisa-bik-asi-loh/

Note: Mino pastor ttuan liomi Tuluk pa pakhat nih, Adam hlan minung hna cu thlarua an ngei lo, nain an sual kho. An sual rii-in Pathian nih an nunnak zuah loin thihnak an cungah atlunter colh,” tiah a chim.

Annih cu Noah buanchukcho tlun lioah an rak thi dih, a timi an rak um ve. Cuti achimtu hna cu Isaac La Peyrère nih buanchukcho tlunnak kong apom ning hecun aa kalh ngai hoi.

Stott nih minung “Human” timi biafang nakin “Homo Sapiens” timi biafang ahman deuh. “Homo Sapiens” timi biafang cu nangmah le keimah bantuk minung tling sinak a ngeimi ca i hmanmi a si lo caah, minung he kan rak i dangdeuh hrimhrim tinak a si hnga. Kanmah bantuk minung an si ko tiah an cohlang ko a si le, Adam hi vawlei cung minung hmasabik a si lo, timi cohlan ding cu an caah thilharsa a si ve lo. Cun Sciences hna hmuhning le Bible chimning kha remter an i timh fawn.

Adam, Ser Hmasa Minung A Sinak  Zohttinak

(1) Genesis 1 & 2 Relning Phun2

(a) Genesis 1 & 2 hi rel ning aa dang cio. Micheu nih Genesis 1 i Pathian nih a nikhatnak ni in a niruknak ni tiang a sermi thil cu, Genesis 2 minung a sermi he aa dang an ti. Cucaah Genesis 1: 26-31 i mipa le minu (Male and Female) timi cu Adam le Eve an silo, Adam le Eve cu Genesis 2: 7-25 lawngah ser an si, an ti. Asullam cu, mipa le minu cu Pathian nih Gen. 1 ah a ser hna i karh dingin thlawchuah a pek hna. Pathian nih a sermi vawlei ah anmah duh tein an rak tlongleng. Cuhnuah Pathian nih Gen. 2 ah mipa (Adam) a ser. Eden dum thlotu le vengtu dingah a chiah. Asinain, mipa (Adam) amah lawng i a um hi a ttha lo a ti caah minu (Eve) a ser piak, tiin Genesis 1 & 2 cu an rel.

(b) Genesis 1 & 2 hi Laimi tamdeuh nih kan rel ve ning le fianning hecun a hun i dang deuh ngaingai. Genesis 2 hi felfai tein kan reltthan tikah Pathian nih adang tein minung a sertthan siloin, Gen. 1: 26-31 i mipa le minu a ser hna ningcang tu chim duhmi aa dan ruangah ttialtthan a si, tiin kan leh ve. Bible sullam fiantertu pakhat nih, Genesis 1: 1:-2:25 nih thil biapi pahnih a chim. Sullam aa kalh in a chim lo, chim timhmi tu aa dang, a ti (Wintle 2015, 13). Cucaah Genesis 1 & 2 hi zeitindah na rel i a sullam naa leh?

(2) Genesis 1:1-2:25 Tinhmi

(a) Genesis 1:1-2:3 nih zeidah alangter timi kan fian dingah SABC (South Asia Bible Commentary) ttialmi ka van char lai, “Zeitikni ah zeipawldah a ser hna timi le sermi aa lim hnuah a nisarihnak ni ah aa dinhnak kha felfai tein a langhter. Pathian nih ai rep tein thil hi a ser hna timi thuk deuhin langhter kha biapi ah a chiah. Lungbuai awk umlo dingin ningcang tein Pathian nih anmah le umnak ding hmunah a chiah hna…,” tiah a ttial (Wintle 2015, 13-14). Phun dangin chim cun, Genesis 1 nih minung (Adam le Eve) ser an rak sining tlingten a ttial rih lo. Cun Pathian nih a nisarihnak hnu pinin zeithil hmanh aser ti lo, aa din. A baattuk ruangah a si lo, thil ser aa lim cang caah rianttuan loin a um ni a si tinak a si (Hartley 2012, 50).

Genesis 2:4a cu acunglei bia vialte funtomtu a si. Lai Baibal Thiang nih ahmanmi biafang ahun i dawh kawh ning, “Vawlei le van i a ummi thil vialte ser an si ning cu cuticun a si,” a ti.

(b) Genesis 2: 4b-25 nih cun, a niruknak ni i minung sernak kong kha biapiah chia-in achim ve. Sermi thildang hna le minung serning aa dannak cu Genesis 2: 4b-25 nih fiang tein a hun hrilhfianh  (Wintle 2015, 16). MacArthur Study Bible nihcun, a niruknak ni i a sermi minung, a serning a nekcok (Details) tiangin a hun ttial a ti (Gen. 2:4-25 [The MacArthur Study Bible]). Pathian nih, “Atu cu minung kan ser cang hna lai; kanmah mui an keng lai i kanmah he kan i lo lai…,” ati (Genesis 1: 26f). Pathian muisam kengin ser kan si cu a fiang nain, zeitin ser kan si ticu Genesis ttialtu nih angan 1 ah chim aa tim lo. Genesis 2 tuah Pathian he aa loin ser kan rak sining a dang tein a ttial (Gaebelein 1990, 2:40). Bible thiamsang pakhat nih attialmi ka duh ngaimi cu, “Bible cu minung caah ttialmi a si caah, Pathian nih minung thawhkehning (His Origin) an theih khawhnak hnga, minung serning cu tlingtein Gen. 2 ah attialnak a si…,” a ti (McGee 1981-19, 16).

(3) Biafang Hmanning Zohttinak

(a) ‘adam timi Hebrew biafang nih sullam phun2 a ngeihmi cu, “Minung” ti le “Adam” ti a si. Hebrew Bible nih aa khatmi biafang a hman. “Minung” ti tikah, pa le nu i dannak le kum no le upa, techin fapar vialte kha a huap dih. “Adam” timi balte ser hmasabik mipa min ah a hman. Genesis 1:1-2:25 nih ‘adam timi a hmanmi cu Hartley nih, minung (Man) tiah a leh. Adam nih anupi cu Eve tiah min a sak hlanah minu (Woman) tiah rak auh a si bantukin, Adam tiin Pathian nih a auh hlan chung cu, mipa (Man) tiin rak hman ve a si tiah hrilhfianhnak a tuah (Hartley 2012, 48,59).

(b) Genesis 1: 27 ah mipa le minu (Male and Female) ti lawngin aa ttial. Hi biafang hman herhnak aruangcu Pathian nih pa le nu (Gender Differences or Sexual Distinctions) a ser hnanak fianter a duh caah a si kan ti khawh (Hubbard and Barker 1982-, 33). Pathian nih mipa cu Adam tiah a auhhlan chungpoahcu mipa cu min a ngei lo. Cucaah, mipa (Man) tiah rak auh a si. Cubantuk tthiamtthiam in minu zong Adam nih Eve tiah min a sak hlanchungcu Pathian nih minu (woman) tiah a auh, cun Adam zongnih minu (Woman) tiah a auh ve tthiamtthiam (Genesis 2: 22, 23). Adam hlanah minung dang ser an sinak langhternak caah hmanmi a si hrimhrim lo.

Mipa le minu tinak zawnah Adam le Eve min hmancolh sisehlaw, Lai Baibal Thiang lawng a rel khomi Laimi cheukhat cu ahodah pa (Male)? ahodah nu (Female)? ti theihduh in Pastor kip kan hal ka zumh. Adam le Eve tinak in mipa le minu timi biafang nih pa le nu ser an si a fianter deuh seomau.

Adam min cu Genesis 2: 19 hnu lawngin a lang. Eve cu Adam minsak a si (Genesis 3: 20). Cuhnuah Adam le Eve cu an minten kan auh hna (Genesis 4: 1). Gen. 2: 7-23 reltthan law, mipa ahman chel, Adam ati chel, cun, minu tiah a auh mi cu Eve arak si ti zong nan hun i fian cio ka zumh. Cucaah, mipa le minu timi cu Adam le Eve kha an si ko.

(c) “Minung hi vawlei in ser kan sinak a fiang. Minung pakhat takpum ahhin chemical dat phun 15 or 16 hrawng a um. Minung takpum ah a ummi chemicalphun 16 cu vawlei ahhin a um ve tiah,” tiah mipakhat nih a ttial (McGee 1981-19, 19). “Homo Sapiens” in sermi kan si lo. Zawng sinak in duh sahtein minung sinak ah kan i thleng lo. Vawlei or leidip in ser kan si. Pathian kutchuak kan si (John 1:1-4).

(4) Biahalnak Pa2 (?)

? (a) Genesis 2: 5. Adam hi vawlei cung i minung hmasabik a si lo nan ti vekvek ah, Pathian nih, “Vawlei cung i rian a ttuantu ahohmanh an um rih lo,” a timi zeitindah nan kan leh lai?

? (b) Genesis 2: 18. Adam hi vawlei cung i minung hmasabik a si lo, nan ti. Pathian nih, “Mipa amah lawng i a um cu attha lo” a timi zeitin nan kan leh lai? “Asinain amah caah cun hawile bawmtu an um lo (Gen. 2: 20),” ati tthan. Pathian nih Adam hlanah a sermi minung a philh sual dara? Pathian cu zeizongza vialte theidihtu a sinak kan hlawt maw a hauh kun lai (Salm 139)?

(5) Adam Hlanah Minung Dang An Um Lo

(a) Genesis 4, 5, 10; Matthew 1: 1. Genesis le Matthew ah Pathian sermi minung hna an chuahkehnak tampin rel awk a um. (Bible ah tefa hna kong kan rel tikah ngut kan hmang hna, chuahkehnak kong le anmin hna hi rel loin lonh a hmangmi kan um fawn). Biakam Hlun ah aa dot thliahmah in ttialmi tefa hna anmin (Chronology of Old Testament Patriarchs) ah Adam hlan minung hna chuahkehnak le tefa hna rel ve awk a um lo.

(b) Cain nih a nupi cu Adam hlan minung le khuami atthitmi a si nan ti. Cain nih anupi thitmi miphun le khuami he pehtlaiin Bible a nehnaang kawl awk um in ka thei lo. 2005 lioah ‘Camp’ i cawnpiaktu sayapa nih Cain nih afar nupi dingin a tthit cu Bible nih a kham a rak ti. Cucaah, Cain nih Adam hlan minung cikor chungin a tthit leh loah, ahodah a tthit lai a ti? Cain nih ahodah nupi caah arak tthit timi ahohmanh nih kan hngal kho dih lo. Asinain, mahfar or chungkhat aa naih tukmi tthit lo dingin Leviticus 18: 7-17 lawnglawngin Pathian nih nawl a rak pek hna. Abraham nih afar Sarah nupi ah a rak tthit (Gen. 20:1-18). Isaac nih a nupi Rebekah cu ka far a si a ti tthan ve tthiamtthiam (Gen. 26: 6). Jacob nih Leah le Rachel cu nupi ah a tthit hna. Jacob nih anu ttapa fanu pahnih a tthit hna tinak a si (Gen. 29:13). John MacArthur ttial ning cun, Cain nih afar (Adam nih hnuah a hun ngeihchin mi fanu Gen. 5: 4) nupi ah a tthit a ti (Gen. 4:17 [The MacArthur Study Bible]).

Far le nupi ah tthit timi zawnah hin, nule unau fale si hna seh, pale unau fale si hna seh (cousins) kha chimduhnak a si. Aruang cu, kha chan lio i an nun phung a rak si ve (Earley 2013, 11). Cain nih afar atthit tiin nan pom duhlo cu thil poituk a si tiin ka hmu lo. Cain nih Adam hlan minung atthit timi belte pom tlakin Bible ah fianternak a um ve lo.

(c) Adam hlan minung vialte cu Noah buanchukcho lioah an thi chihve maw? Adam hlan minung an sual venak le dantat an i huahnak Bible ah a um lo.

Adam in Noah chan tiang minung hna an rak sualtuk ruangah Pathian nih ka hrawh lai ati bangin a rak hrawh dik taktak (Gen. 6: 7- 8: 16ff). Buanchukcho tlun hlanah, Cain le a nupi nih tefa tampi an rak hrin manh hna (Gen. 4: 16-22). Adam le Eve tefa hna min cazin zoh tikah, Pathian nih Gen. 1:28 ah thlaw a chuahhna ning le tefa tampi in ngei u ati hna ning in an rak karh ngaingai (Gen. 5: 1-32; 6:1). Adam hlan cikor hna sual ruangah Pathian nih vawlei cu tiin a ttawl si loin, serhram thok a simi Adam chan in Noah chantiang minung an rak karh tlukin sualnak a rak karh tuk ruangah Pathian hmaiah adingfelmi Naoh le a inn chungkhar le lawngchung um vial lawng kha an nun rak zuah an si kan ti khawh.

Genesis 6 i Pathian fapa hna le minung fanu hna tinak zawnah hin, Adam hlan minung a um cang tiah a pom tuhna nih, Adam hlan minung an si tiah an leh khawh men. Pathian fapa hna cu ahodah an si? Bible scholars, Bible Commentators le Bible Dictionary ttialtu hna ttialning le fianhternak an pek ning aa dang cio. Genesis in Biathlaam tiangah afianternak a um ti lomi i lak riangmang in Adam hlan minung hna cikor an tiah fektuk in i tlaih awk a ttha deuh hnga maw?

References

Earley, Dave. 2013. 21 Most Effective Prayers of the Bible. Uhrichsville, Ohio: Barbour Pub. Accessed June 29, 2017.

Gaebelein, Frank E. 1990. Expositor’s Bible Commentary. Vol. 2, Genesis – Numbers. Grand Rapids: Zondervan Pub. House.

Green, Joel B. 2008. Body, Soul, and Human Life: The Nature of Humanity in the Bible. Studies in Theological Interpretation. Grand Rapids, Mich.: Baker Academic. (Green 2008, 61-64)

Hartley, John E. 2012. Genesis. Understanding the Bible Commentary Series. Grand Rapids, Mich.: Baker Books. (Hartley 2012, 39-64)

Hubbard, David Allan, and Glenn W. Barker. 1982-. Word Biblical Commentary. Waco, Tex.: Word Books.

McGee, J Vernon. 1981-19. Thru the Bible with J. Vernon Mcgee. Nashville: T. Nelson.

Wintle, Brian C. 2015. South Asia Bible Commentary. Grand Rapids, MI: Zondervan.

http://creation.com/. 2017. June 19. Accessed June 21, 2017. http://creation.com/pre-adamic-man-were-there-human-beings-on-earth-before-adam#box. (http://creation.com/ 2017)

Advertisements