Kan hnuthla ah booklet tete khi uk 5-10 hrawng ka rak cawk, kai manh deuh lo caah rel loin ka fim chung, i tuzarh hi kan van free deuh tiah pakhat ka van lak i ka rel. Hi cauk pen tenih ka nun ah rian atuan ngaingai. Phundang incun sullam nei ngaiin khuaruahnak le biahalnak tampi ka lungthin ah a chuahpi khawh kan ti ko lai. Cu cauk cu Donald Dunn nih comment apek, cucu “Prayer, the Real Battle” timi cauk chungah an telhchih, cu biatlang cu tlang 6 hrawng sau in tialmi asi. Tutan ah cu catlang cu laimi kan context in van zohtti dingah kan van chuahpi i, online careltu lungthin ah hmunhma la ve seh law, sullam nei ve hram seh ti duhsahnak he a tanglei ah kan rak tar. A tanglei bangin Donald Dunn ca cu asi;

            Kan Bible chung “Lamkaltu Cakuat cu thlacam tonpumhnak in a khatmi asi; avoikhatnak rak dirh hmasami Khrihfabu cu thlacamnak ah an rak phum hmasa. Pentecost Khrihfabu kan zoh tikah, nihra chung thlacamnak an rak nei, i minutes 10 chung Thawngtha an rak chim, i minung thongthum (3,000) khamh an rak si. Tuchun ahcun, minutes 10 thlacamnak kan nei i, nihra chung Thawngtha kan chim, asi kun ahcun lawmhpi awktlak in mi pakhat tal khamh an si maw?” tiah Donald Dunn nih sikpah, biacahpah le zuamcawhpah in arak tialmi kha, airemnak dingin ka van lehmi asi.

            Tuchan mitampi cu thlacam ah kan tha athu, cun Thawngtha chim ding zongah timhlamhnak ah mitampi kan chanbau ngaingainak hmuh khawh asi lengmang (keimah telh in). Midangpi hmur in a chuak tawnmi cu Thiangthlarau nih Thawngtha a chim lai tiah timhlamhnak nei loin Pulpit cungah an kai theo tawn, cucu ruahsia arem deuh vak lo. Pathian nih amah thazang lawngin riantuan hi ai tim theng bal lo timi Israel miphun nun in Bible nih akan cawnpiaknak hmuh khawh asi.

            Thlacamnak hi zumtu nunah abiapi taktakmi raldohnak hriamman pakhat asi. Cathialthiam Andrew Murray nihcun hitin ati “Khrih nih zeitindah Thawngtha nan chim lai tiah zultu hna sinah arak cawnpiak bal hna lo, nain zeitindah thla nan cam lai timi tu arak cawnpiak hna. Zeitindah minung kan chawnh lai timi theihnak in zeitindah Pathian chawnh asi timi theih atha deuh” tiah atial. Chim duhmi cu thlacam hi Khrih-zultu hna nih kan rian asi i, kan teinak hramnam thabik zong asi ve.

J. Khua Uk (Ukpi.CZ)