By Isaiah Ngun Nawl

Pope Francis nih, “Khrihfa hna le Muslims cu u le nau, ta le far kan si dih hna” tiah a ti bal. Muslim le Khrihfa nih aakhat mi Pathian kan biak a ti duhnak a si ahcun, ‘Chrislam,’ (Christianity+Islam=Chrislam) tiin biaknak minthar a chuak hnga i alar ngai cang hnga. Kan biakmi Pathian i danning tlawmpal in kan van langhter hmanh lai.

1. Khrihgfa Baibal ah Pathian cu pakhat a si. Mipum pathum (Pa, Fapa le Thiangthlarau)  ngeiin Baibal ah fiangte’n a lang (Mat.28: 19). Asinain Islam biaknak nih cun an cohlang lo. Muslim pawl nih, Jesuh cu Pathian profet ngan pakhat asi, nain profet Mohammad nak in a nauta deuhmi a si; Pathian a si lo,” tiah bia-al nak an tuah.

2. Khrihfa nih Fapa Pathian cu minung sinak i thuamh in a sermi minung hna khamh dingah vawlei ah a ra (Johan 1: 1-18), kan ti. Islam biaknak nih cun cucu an hlawt bakmi a si.

3. Khrihfa Baibal ah minung cu sual in hrin kan si or misual kan si dih tiah aa tial (Efe. 2:1-10). Asinain Muslim pawl nih, minung nih sualnak kan tuah cu kan derthawm ruangah le kan i thlahthlam tuk ruangah asi, tiin bialehnak an tial ve.

4. Khrih Jesuh zumhnak thawng lawngin zungzal nunnak cu co khawh a si. Cucu Khrihfa caah cun a sunglawi bikmi le thawngtha biatak a si; thawngtha dang um lo, tiah fek tein hram kan bunh. Cuhe aakalh ngaimi cu, Islam biaknak ah cun Muslim paoh2 nih nunnak an co i, paradise luh ding caah cun an cathiang, Qur’an chung tialmi nawlbia vialte an zulh dih a herh ve. Asullam cu, tuahsernak or nawlbia zulhnak thawngin khamhnak co ding an i ruahchan caah a si.

5. Vawlei tuanbia (history) zoh hmanh hna usih; Khrihfa le Muslims cu zeitikah khin dah lungkhat in rian an tuanti bal? Ngol loin pei kahnak le dohnak thawng kan theih hi? Pope Francis bia bangin u le nau le ta le far cu rak si tak ko ahcun, an rak i huat zungzal ko hmanhah an i dawtnak chim tlak kan ngeih ve awk a si. Muslim nih Khrihfa zumhnak thlen aa zuam ve zungzal bantukin, Khrihfa zongnih Muslim pawl nih khamhnak an co nak hnga thla kan cam piak ve zungzal hna.

Khrihfa Pathian cu Baibal Pathian tiin atnaglei ah ka run hman lengmang cang lai. Islam zong cu Qur’an an ngeimi an si ve ko caah, hihna biaknak pa2 nih Pathian kongah an cawnpiak ning aa dannak tete ka van tial chap lai.

1. Baibal Pathian cu pehtlaih khawhmi Pathian a si. Khrihfa mi hna nih kan Pathian cu nitin tein hawikomhnak kan ngeih khawh peng. Sihmanhsehlaw, Allah (Muslim pathian) cu minung he hawikomhnak a ngei ballo. Amah he hawikomh ding zongin nih a fial bal fawn hna lo. Islam cathiang, Qur’an ah Eden dum chungah pathian nih Adam le Eve bia a ruah hna nak a um lo. Allah le minung pehtlaih khawhnak lam pakhat an i cawnpiak ning cu, bawi le sal dirhmun lawngin a si kho. Kan i dannak cu a fiang tuk ko rua? Bawipa Jesuh nih “sal kan titi hna lai lo, ka hawile ti tuin kan ti hna lai (Johan 15: 15),” tiah bia a kan kamh. Ava sunglawi dah!

2. Baibal Pathian cu amah te’n aa phuangmi Pathian a si caah minung theih khawhmi Pathian zong a si. Biakam Hlun hmun tampi ah Bawipa aa phuannak kan hmuhmi lak i pakhat cu Exodus 3 nak khi a si. Allah bel nih cun mizei sin hmanhah pumpak in i langh le aa phuannak hmuh ding a um lo. An profet ngan Mohammad sin hmanhah khan direct in a rak i langh lo. Vancungmi Gabriel hmangin indirect lawngin aa langh. Vanmi hmangin aa langhnak hmanh hi adik taktak ko tiah chim khawhnak thazaang a um ngaingai lo.

3. Baibal Pathian cu, dawtnak Pathian a si (1 Johan 4: 16). Daw hmasatu zong a si. Amah sinak (nature) hrim2 kha dawtnak Pathian a si. Qur’an chungah Allah cu dawtnak pathian a sinak khuika hmanhah a um lo. Qur’an chungah dawtnak, ‘love’ timi biafang cu voi28 a lang, cu chung cun, voi22 hi cu negative lei lawngin a lang. Tahchunhnakah, Allah nih a dawt-lomi hna cu zumhnak a hlawmi, nawlngai lomi, thilsual a tuahmi, aa porhlawmi, lawmh a hngal lomi tbk lei lawngin a lang fawn. Adang voi6 chung hmanhah hin, Allah nih a dawtmi hna cu amah caah thil pakhat khat a tuah piaktu hna lawng kha an si. Khrihfa Baibal Pathian nih cun Roman 5: 8 ah, ‘Pathian nih a kan dawtnak cu hitihin a langhter, misual kan si ko lioah khan Khrih cu kan caah a thi’ a ti. Cun ‘Pathian kandawt cu, Amah nih a kan dawt hmasa caah a si (1 Jn. 4: 19),’ a ti than rih. Allah bel amah a dawtu lawng a dawt hna.

4. Baibal Pathian cu sual ruangah kan in-tuar dingmi akan in-tuar piaktu le kan nganfah nak vialte chung zongah a kan telpitu le bawmtu a si. Ami hna nih sualnak an tuah tikah a ngaihchia i an sualnak nih khan Pathian lung a fahter. Asinain kan sualnak ngaithiamtu zong amah Pathian thiamthiam kha a si zungzal. Allah belte cu ami hna an sual tikah a thinhung, bia aceih hna. Asinain an sualnak thianhpiak le ngaihthiam an sinak ding caah cun zeihmanh kha a tuahpiak bak hna lo. Muslim theologian Muhammed-al-Burkawi nih, “Allah nih amah nih a rem a ti ahcun vawlei pi hi a hloh khawh i chikkhatte ah a tharzong a serthan khawh. Vawlei cung thil cangmi vialte nih hin Allah caah thathnemnak siseh, sunghnak siseh a chuahter kho hlei lo. Mi poahpoah zumtu an can ah siseh, mithalo hna kha biaknak lei ah aa zuam ngaimi ah an hun i thlen ah siseh, Allah caah zeihmanh thathnemnak a ngei hlei lo. Zumtu vialte zong zumlotu ah an i can dih hmanhah, Allah nih zeihmanh sunghmi a ngei hlei fawn lai lo,” ati. ASullam cu Allah nih misual khamh an herh le herh lonak kong cu zeihmanhah aa ceih kho lo ti he aakhat. Kan Baibal Pathian belte cu dawtu Pathian a sinak kha mizapi cungah a langhter zungzal. Sualngaihthiam kan si i, zungzal nunnak kan ngeih le zungzal amah he umti khawhnak ding caah amah lila nih a kan in-tuar piak. Amah cu kan Liannganbik le Cungnungbik Bawipa Pathian a si. Amin thangthat in um zungzal ko seh.

Note: Pumpak hmuhning van langhtermi a si ko caah, na pom ve ning he aa dang kho ko. Kei ka dik, nang na palh tinak lungput he rak tialmi a si lo caah, Islam le Khrihfa biaknak nih aa khatmi Pathian kan biak ko tiah na pom  a va si hmanah, cutiang ahcun va dongte ko sehlaw, bia-al nak le huatnak chuahter lo i zuam cio hna usih, titu biacah kan duh hna. Na pumpak cohlan ning tucu zalong tein article in rak langhter ve law cu ahcun zeizongza zoh aa rem ko lai. Kalawm.

References

https://www.bethinking.org/islam/do-christians-and-muslims-worship-the-same-god

http://www.charismanews.com/culture/53942-how-the-deception-of-tolerance-and-chrislam-is-destroying-america

 

Advertisements