By J. Khua Uk (Ukpi. Cz)

Bawipa caah zumhawk-tlak taktak a simi Job nih, “minung kan nunnak hi min-mei zam he a tahchunh, cun thiamphei-fung khawhmi btk asi” a ti (Job 7). Mi pakhat nih FB timeline ah thlanlung-pher ai tarmi ka hmuh. Cu thlanlung ah an ttialmi min le kum hna kha ka hei rel. Cu thlanlung-pher ka hmuhmi nih ka khuaruahnak phundang tukin aka tuah, ka lung aka tuaitam, i khua zaza aka ruahter. Ka ruahmi cu hihi asi, atu thlan ah ka hmuhmi min an ttial btk in khin, nikhatkhat ahcun ka min zong thlanlung-pher cungah an ttial caan aum ve lai tikhi asi. Tuni class dinhkar ah chikhat social media ka van zoh ah ka hmuhmi ca nih, aw hitluk lawmmam in maw?kan nunnak hi atawi ko timi ka ruat colh, cun kan nunnak hi kanmah kut chungah aum lo zia fiang tukin ka theih tthan.

Cucu “US, Des Moines ah khuasa Chin patung-no Steven Pausuan Kim cu April 22 zan ah, misual nih a mawtaw ciachung le a fa le hmai ah meithal in an kah timi ca asi” (Chinland News). Fa le he nuam ngai in le dam tein inn in avan chuak komi kha, ruah lo pi’n thihnak nih aphak ve tikah zeitluk indah chungkhar caah ahei fak hnga i, tuar ahei har hnga?a fa le he an rak chuah ahhin hi thil hi ka tong lai tiah arak i ruat hrim ve hnga lo, cun a chungkhar hrimhrim zong nih hi btk thil atlung lai ti cu an zanmang hmanh ah an ruat ve lai lo. Cu btk tthiamtthiam in Thailand ram, Phuket thetse lak i hotel pakhat ah kum 21 patung-no te nih a fanu kum 1-2 kar cu hri in a thlai i, amah zong ai that lila ve (Faiceu News). Cu thil a cannak aruang cu an nu nih padang ai duh rua tiah a lunghrinhnak thawngin cu btk biakhiahnak aser cu asi (an pafa in palik nih an ruak an lak lio hna video zong social media ah hmuh khawh asi, an hlo cang maw? cu thei ve hlah).Minung kan nunnak cu cute cu asi ko, minute pakhat ah a lo khomi asi.

Asi ahcun, cu thihnak cu kan sin ah pha ve seh law timi khuaruah lo awk attha ti lo. Kan dawtmi hna kan chungkhar, kan fa le si hna seh, kan nu le pa, kan u-nau le dawtmi hna kaltak ding ruah ah sian aum hrimhrinm lo, nain cucu kan hrial khawhmi an si lo. Atu kan theih tawnmi anih kha athi, khakha nih akan liam tak timi kan theih lengmang btk te hin, ni khatkhat ahcun kan hawikom le nih kan minchar in anih nih akan liam tak cang timi kong athan caan aum ve te lai i, kan min cu thlanlung-pher cungah ttial caan apha ve te lai. Chungkhar he kan i tthen caan apha lai, cucu kan kham kho lai lo. Asi ahcun na sian lomi na dawt maw? asi loah, na fa le maw? asi loah na chungkhar nu le pa maw?asi loah na chuahpi na u-nau maw? ton tthannak ding hmunhma kan nei lai maw?tihi kan i hal ahau ve cang. Hi nunnak adih hnu ah chungkhar tling tein ton tthannak aum kho lai maw? Cun na thlanlung lawngah maw?na min ttial asi te lai, kan nunnak adongh bak in kan min aloh ve ding cu kan ruah khawh ko lai maw?na nuncaan tawi teah, zeidah mipi ca le Khrih ram ca’h tuhmi thlaici kan neih ve ti kha bia kan i hal aherh tuk cang. Khawika ahdah kan minttial asi ve ti zong kan ruah an hau. Kanmah caah thih-dar an tum caan apha ve lai, cucu thaizing zong asi kho, i tuzan zong asi kho, cun hmailei caan tam deuh hnu zongah a si kho. Cucu ai fiang cemmi cu kanmah caah thihdar an tum ni-caan apha ve te lai ti asi ko, nain zeitik ah ticu kan i fiang lo, cucaah, atu kan caan hi zungzal nunnak kan phaknak hnga caah caan biapi cem asi tikha kan theih peng ahau.

Kan duh lo zongah hi nunnak cu adong tthan lai, nain Khrih a cohlang mi hna caah cun, “athi khomi kan pum hi thih athiam ti lomi takpum ah ia thlen lai, i zungzal nunnak ah khua kan sa lai” (I Kor 15;52-54). Cu hmun kan phak khawhnak ding ahcun tulio kan nunnak hi lam asi. A thi khomi na nunnak ah biachah nai palh sual, cun na duhmi lam poh na zulh, Pathain zeirel loin kan nunnak nih cu hmun a kan nganh ter te lai.

Advertisements