By J. Khua Uk (Ukpi.Cz)

Laimi phun zong Pathian thawngin Bible phun-thum (3) kan nei kho ve cang. Tleicia kan pa Divid Van Bik nih a kan lehpiakmi Lai Bible Thiang ti a si, ai cherhchanmi Bible cu mirang nih TEV (Today English Version “palh lo ahcun”) an timi chirhchan in lehmi arak si. TEV cu biafang in lehmi Bible si loin sullam in lehmi Bible a si. Cucaah nai teah Evan Rual Uk nih a kan lehpiakmi Bible Thiang he khin ai dannak tete a ummi a lo. Evan Rual Uk nih a lehmi Bible cu Mirang nih NKJV (New King James Version) an timi a si. NKJV Bible cu sullam in lehmi si loin biafang in lehmi Bible a si. Hi kong hi ttial le fianhpah ahau ve cang ko rua, a ruang cu, vawlei killi ah laimi phun zong kan phak ve tik ah, Lai Bible lawng rel a si ti lo. Mirang Bible zong mitampi nih kan hmang ve cang.
Cucaah tuten ah ka van chuahpi mi hi biapi ngai a si rua dah ka ti. Bible version kongah micheu-khat nih kan ruah ning ahcun NIV (New International Version) hna cu hman ding a si lo an ti, cun ca zong an ttial len fawn cang, cun kan hnu kum chungah ah voi hnih lengkai ca an ttialmi hmuh a si cang (online news ttialtu pawl sin in “Vakok Daily”). Cu ca chungah an ttialmi cu NIV cu hmang lo ding a si, kan Bible a tling lo, an ttial hrelh mi bible cacaang a tam tuk ti btk in an kalpi. Cucu theihfian lo ahcun a si taktak hlah maw? tiah rauh a fawi te. Cun a ruat tawk zong cu kan um fawn cang, hi ruahnak nih hin Lai Bible karlak zongah thleidannak a chuahpi ve cang. Cattialtu cheukhat nih an ti bangin hi bible cu hman awk a si lo, bible tling a si lo tiah chim awk a si maw? timi tlawmpal in fianh khawh kan rak zuam lai. Cun Laimi cheukhat lak ah tulio a van chuak tthan mi cu Evan Rual Uk nih a lehmi khi, a ttha deuh tiah a chim tawk zong kan um pah, i Lai Bible Thiang nih biafang a ttial lomi a tam tuk tiah kan ti ttheo tawn. Asi cun a tangah NIV le NKJV biafang tlin lonak le cacaang herlhmi tete ka van langh ter lai, i biadonghnak lei ah zeiruangah timi hrilhfiahnak ka pek te lai.

NIV bible ah a tling lo tiah micheu nih an chimnak cacaang tampi lak ah tlawmpal lawng ka van chuahpi lai, cu hna cu an ttial tak lo mi maw? a si, ttha deuh tein zohfelnak kan neih lo ruang hna ah a si sual maw? timi tuten ah, hi ca thawngin na van i fiang deuh ttheo lai tiah ruahchannak ka nei. NKJV ahcun John 5:4 khi tling tein ai ttial (Lai Bible zongah an ttial ko). Nain NIV khin van zoh law, relnak 4 nak zawn ah, number 4 lawng an ttialmi na hmuh lai. Khi btk in cattial loin number lawng an chiahmi ruangah micheu nih cun NIV ah Bible bia an ttial lo tiah kan ruahnak cu a si. A si cun an ttial taktak le ttial taktak lo van zoh ta hna uh sih. Phone in Bible hmangmi na si cun, number 4 kha van hmeh law, an hrelh rua tiah na ruahmi biafang na hmuh khawh lai. Cun a Cauk in ai tleihmi na si ahcun footnote ah hei zoh law, an hrelh rua na timi cacaang kha na hmuh ko lai. Hiti an chiahnak sullam cu biafunnak ah ka van fianh te lai. Part II cu caan a nei nihcun a tang link ah rel chung khawh a si. 

Cun I John 5:6-9 zong kan van zoh ta rih uhsih. Khi cacaang ah mitampi nih an chimmi cu Pa, Bia le Thiangthlarau timi can-ai ah Thiangthlarau, ti-water le thisen-blood tiah NIV nih cun an ttial, nain NKJV ahcun Pa, Bia le Thiangthlarau tiah a ttial. Cutik ah kan Lai Bible pahnih kar zongah biafang dannak a chuah cang. Cucaah micheu nih Evan Rual Uk lehmi a ttha deuh an tinak zong cu a rak si phah. Nain hi cacaang zong cu footnote ah khan van zoh tthan uh law, fiang tein na hmuh ko lai, khi kazawn ah mirang ca relkho lomi caah ka van ttial fianh ta lai, Kut in ttialmi bible “manuscripts” ahcun Father/Pa, Word/Bia le Holy Spirit/Thiangthlarau timi biafang kha, kum zabu 14 hlan ah Greek holh in an rak hmuhmi a si lo tiah fiang tein footnote ah ttialmi na hmuh lai. Cucaah Bible biafang an ttial lo tiah kan ruahmi khi kan rak theih deuh lotu hna a si sual kho ko. Bible kan hman tik ah biathuk pipi in ttialmi hman i, fianhnak (explanation) pek a hau lengmangmi le zapi nih an i fian tuk lomi biafang hman lennak cha incun a awlzang mi te NIV hna zong cu a ttha deuh suamuai kho men ko. Khi btk in micheu nih NIV nih a ttial lo tiah an ruahnak cacaang a um pah len rih ko, ka van ttial ti lai lo catlang asau ter lehlam.

Acung ah kan chimmi cacaang, a cung le a tang kha relchap law, biafang nolhmi tu an si ti na fiang lai. Cucaah ttial hrelh si loin, ttial nolh a herh lomi tu an si tiah an ruah caah footnote tuah an chiahnak aruang (reason) pakhat a si. Kan Bible original hi a umnak theih a si ti lo, hihi Pathian nih zei caah dah a kan fimkanh timi cu Pathian sin lawnglawng ah a phi a um. Nain a hlun cem tiah ruahmi copy tuahmi bible 4 tu cu an um rih ko. Chim duhmi cu Bible kan hmanmi hna hi copy mi chungin le lehchawmmi chung lawng te an si dih cio ko. Cucaah bible ahhin tthawnnak um loin Bible a kan petu Pathian sin tuah tthawnnak cu a ummi a si caah, a chia deuh le a ttha deuh tiah thleidan awk a ttha lo i, chim phun ding zong a rak si hrimhrim lo. Hi btk biafang a hmangmi pawl kha zei btk sianginn indah a chuakmi an si i, a ho cawnpiaknak indah hrintthannak a hmumi an si ti tu kha dawi deuh awk an si hnga. Saya ttha lo nih siahngakchia ttha a nei kho lo. Zeitindah bible leh asi ti le copy tuah a rak si timi kongah ttial ding le chim fianh ding a tam ngaingai. Study tuah lem loin online cahmai pakhat, pahnih relnak le theihnak thawngin i thawh riangmang in bible ciocio ah a chia deuh e, a ttha deuh e tiah biachim tuk le aukhuan len khi thil dawhcah a rak si hrimhrim lo, i mipi lehlam kan vaivuanh hna tikha kan theih ahau, a sum tu kan i sum deuh a hreh.