Dr. Dave Earley nih, “Helen Roseveare cu Congo (Africa ram) ah kum 20 chung missionary a tuanmi, sibawi pakhat a si; Aliamcia kum 25 lio ah khan hmual ngei ngaimi tuanbia pakhat a chim mi ka ngai bal ve,” tiah cauk pakhat ah a tial.

Zaankhat cu ka thiamnak dihlak in ka zuam sek len ve nain, kum2 hgnakchia nute a nu cu kumtlinglo nau ngaih nak in a nun a liam, tiah a chim. Kumtlinglo bawk keuh taksa lumternak seh (incubator) hman dingah meitha a um lo chinchap ah, nau hnuk dinhnak thilri tlamtling in kan ngeih lo tikah naute nunnak khamh khawh lai lo kan ruah ah biatakte in kan lungre a thei.

Kan umnak hi khuati a lum ngaingai nak (equator) hmun a si, nain zaan balte ah cun a kihning celh a si ve tawn lo. Cucaah naute caah a herhmi thil le sahmul la (wool) in tahmi nau aihpuan cu nau chuahtertu sayama (midwife) pakhat nih a va lak. Adang pakhat nih mei a kau i ti a sat mi cu tithawl ah a rawn ve. Caan tlawmpal hnuah lungrethei ngai mithmai in, “tisa ka rawn mi thawl a kek,” tiah a kan chimh. Ram lum a simi hmunhma ahcun tisa thawl keh cu a rak fawi deuh ngai tak cuh! “Tisa thawl dang pakhat taktak hmanh kan ngeihmi a um ti lo,” a ti.

Vansan ah nau chuahtertu hna cu an pa hnihte in bia ka cahmi hna; “mei kha alh deuh in tuat uh law, naute kha mei kam ah thlim uh, cun a hriang veve in nan it lai i nan kilh lai, nan rian cu naute khualumter kha si,” ka ti hna i, ka bia al sian lo zong si lai, nain naute an dawt tuk ve hrimhrim ruangah cuti cun zaakhat cu siarem lo ngai in an it hna.

A thaizing chun cu, cuhlan ka tuah kel bangin ka sin ra tawntu ngaktah rual he thlacamnak hmun ahcun kan kal ti hna. Thlacam ding an hun chim cio hna ah, kei nih naute caah thlacam piak kan herhnak le naute a tak kan lumter khawh zungzal nakhnga tisa rawnnak tithawl kan herhnak kong zong cu ka chimh hna. A kih tuk ahcun naute hi sau a nung ding a si lo. Cupin ah, naute a u nu hi kum hnih lawng a si ve rih tikah a nu hlam in a tap ve zungzal ti zong in ka chim chih. Cuti thla kan cam lio ah cun, kum10 te lawng a si rihmi hngakchia nute, Ruth nih cun, “Maw Pathian zaangfahnakte in, tisa rawnnak tithawl rak kan chaan (kua), cuti locun thaizing cu ni tha a si lai lo; naute a thi sual lai, cucaah nihin chun ah rak kan kua hram ko tiin lungtakte in thla a cam. Cun, zeitlukin na dawt kha naute nih a hngalh khawhnak hnga a hrangah lentecelhnak tunu te zong rak kua chih hram ko sawh,” tiah thla cu a cam.

“Amen” pek ka vun i harh ngaingai. Pathian nih zeizongza vialte a tuah khawhdih ti cu ka zumh ko, nain kha hngakchia nute thlacamnak kha Pathian nih a leh lai tiah ka zumh kho hrimhrim lo. Pathian nih a thlacamnak a leh bik ah, Africa ram ah kum4 chung ka um cang; inn lei in thil an hun ka kuat dah ti locun, ruahchan awk pakhat hmanh khi a va um lo. An va ka kuat hmanh ah aho nih dah tisa rawnnak tithawl thengte cu an hei sanh hnga mu? ka umnak hmun le khua linhvanghnak a si chap rih!

Thlacam kan tin hi chun laifang tak a si i, kei balte hngakchia zohkhenhtu sayama (nurses) pawl cawnpiaknak ka ngeih ta hna. Culio ahcun, “na inntual kutka ah mawtaw pakhat a dir,” tiah cakuat pakhat ka dong. Inn ka tin ahcun mawtaw cu a rak kal manh cang, nain veranda (inn leng) ah suk (pound) 22 tluk a ritmi thilkuatmi an rak ka ngolh ta. Tah ka zaal colh ko. Keimah lawng van ong ding kha ka siarem deuh lo i ngaktah hna sin ahcun ka va kal pi. Hmunkhatte ah hritem pawl kan van phoih; an tuamnak caaku koko hmanh tlek sual lai kaw ti phang in duhsah le ralrinte in tiah pakhat le khat kan hei i ti pah hna. Hngakchia rual he cun zei le zei ko dah an kan kuat hnga tiin kan lung a tuur cio. A chung van purh lai kan i ngaih ngaih tuk cio hna.

Kei upa bik ah ka kut ka van samh chunh i a chung ka van purhdah taktak cu a lo ko ee ka ti; ka hun thuam i ka kut ka chuah cu, tisa rawnnak tithawl a thar kadak a rak si taktak ai!

Khan cun kei cu tah ka rian colh ko cang. Pathian sin ah ka halmi zong khi a si lo. Pathian nih a run kan kuat lai timi zong ka zum fawn lo. Nain Ruth cu hmaibik tlar a thutnak in tithawl a hmuh le cang kain a tah aw he a hun ka naih i, Pathian kuatmi a si taktak ahcun lentecelhnak tunu te zong a tel chih awk a si! tiah a hlam colh. Taktak kolo ah, a hun purh ve chunh cu tunu dawh hmete cu a rak um taktak ngaingai. A mithmai van zoh ah hin lunghrinhnak muisam a cuang bak lo. A hun ka zoh colh i, “kanu na sinah ka ra ve lai; Jesuh nih a dawttuk timi chimh pah in hi tunu te hi keimah hrimhrim nih pek ka duh,” tiah a ka hal.

Thil an rak ka kuatmi hi thlan5 chung bak lampi ah a vaivuan cang. Khua ka rak um lio sunday school ka chimhmi sianginn hngakchia nih an rak ka kuatmi a si. Atu ka umnak hi khua lum nak ram a si, nain Pathian nih tisa rawnnak tithawl sanh chih ding in amah lak i hruaitu pakhat thinlung ah rian a tuan. Cun, adang pakhat nih ka umnak African hngakchia pakhat lentecelh awk ah tiah tunu dawhte cu a rak sanh chih ngelcel ve. Cuti cun Pathian nih kum10 te lawng a si rihmi hngakchia nute thlacamnak cu a leh; thla kan cam ni, chun lila ah Pathian nih a leh colh! Pathian nih an ka auh hlan in ka leh hna lai tiah a ti (Isaiah 65: 24).

Forhfialnak Tawi: Nu le pa hna, nan fanu fapa he hmunkhatte ah khupbil in thla nan cam dingah thazaang pek kan duh hna. Hngakchia thlacamnak hi Pathian nih a leh lai tiah nan ruat lo cu si lai lo, nain Helen Roseveare (sibawi) nu chim bangin hngakchia thlacam nak cu tiin zei rel lem lo in a ummi zong kan tam pi rih kho. Thlacam hi upa lungfim cia hna tuanvo lawng ah kan ruah sual lo ding ah acunglei tuanbia hmangin fianter ka duh.

Thlacamnak hmun na phanh bakin Pathian nih, “kan pekmi fanu fapa rosung tah thlacamnak ah na rat pi lo maw? an unau rual in ka ngaituk hna dah kaw; an thlacam aw theih ka duh tuk ve,” tiah bia an hal zungzal hna. Zeitin dah na leh lai? Zeitik dah cawnpiak khawh a si lio ah zumhnak in thlacam na chimh hna lai?

Mah le chungkhar cio ah, fale thlacam cawnpiak hram awt hna u sih. Fale he hmunkhatte ah thlacam hna u sih, inn ah siseh biakinn ah siseh thlacamnak hmun i kal pi hna u sih. Anmahte in zumhnak in Pathian sinah thlacam an thiam ding le an nun nih i than pi ding ahcun, nu le pa tuanvo a si. Pastor le sunday school saya/ma te kan rinh sual hna nak hnga lo cah nolh kan duh hna.

Theihternak:

  1. Dr. Dave Earley cauk, “The 21 Most Effective Prayers of the Bible,” chungin ka relmi a sullam biadang in ka van tial chinmi a si (Paraphrased).
  2. Pathian nih caan rem a kan pek si le, fale hi zeitindah thlacam kan chimh hna awk a si timi rak tial peh ka zuam te lai.

Reference

Earley, Dave. 2013. 21 Most Effective Prayers of the Bible. Uhrichsville, Ohio: Barbour Pub. Accessed August 5, 2017.

Nan dihlak cungah ka lawm!